МҮХАҮТ БОЛОН "ЭКСПОЦЕНТР" ХК /2026.02.10/ МОНГОЛЫН ЭКСПОРТЫГ ДЭМЖИХ ЧИГЛЭЛЭЭР ХАМТРАН АЖИЛЛАНА
ОХУ-ын Москва хотноо зохион байгуулагдаж буй олон улсын хүнсний томоохон арга хэмжээ болох "Продэкспо-2026" үзэсгэлэнгийн хүрээнд МҮХАҮТ-ын Ерөнхийлөгч Б.Лхагважав болон "Экспоцентр" ХК-ийн Ерөнхий захирал Максим Фатеев нар уулзалт хийн, хоёр улсын худалдаа, эдийн засгийн хамтын ажиллагааг шинэ шатанд гаргах асуудлаар санал солилцлоо.
Уулзалтын явцад талууд ОХУ-ын Худалдаа аж үйлдвэрийн танхим болон МҮХАҮТ хоорондын хамтын ажиллагааны хэлэлцээрийг бодит ажил хэрэг болгох хүрээнд "Экспоцентр"-ээс зохион байгуулдаг олон улсын төрөлжсөн үзэсгэлэнгүүдэд Монголын аж ахуйн нэгж, байгууллагуудын оролцоог нэмэгдүүлэх тодорхой алхмуудыг төлөвлөв.
МҮХАҮТ-ын Ерөнхийлөгч Б.Лхагважав, Монголын бараа, бүтээгдэхүүнийг Оросын зах зээлд сурталчлан таниулахад үзэсгэлэн худалдаа нь хамгийн үр дүнтэй суваг болохыг онцлоод, энэхүү маркетингийн платформыг ашиглах сонирхолтой байгаагаа илэрхийлсэн юм. Мөн Монголын төлөөлөгчдөд "Продэкспо-2026" үзэсгэлэнгийн экспозицитой дэлгэрэнгүй танилцах, Оросын болон олон улсын импортлогч, түншүүдтэй шууд холбоо тогтоон ажил хэрэгч уулзалтууд хийх боломжийг олгосонд талархал илэрхийллээ.
Энэхүү уулзалт нь үндэсний үйлдвэрлэгчдийн өрсөлдөх чадварыг дээшлүүлж, Монгол Улсын экспортын бараа бүтээгдэхүүнийг Олон улсын зах зээлд амжилттай нэвтрүүлэхэд шинэ боломжуудыг нээж байгаараа онцлог байлаа.
