ХЯТАД МОНГОЛ 2 УЛСЫН БИЗНЕС ЭРХЛЭГЧДИЙН В2В УУЛЗАЛТ” БОЛЛОО

“Монгол, Хятадын хөрөнгө оруулагчдын нэгдсэн арга хэмжээний хүрээнд “Хятад Монгол 2 улсын бизнес эрхлэгчдийн В2В уулзалт” амжилттай болж өндөрлөлөө. Энэхүү арга хэмжээ нь хоёр орны эдийн засгийн хамтын ажиллагааг өргөжүүлэх, хөрөнгө оруулалтын боломжуудыг тодорхойлох, бодит үр дүн бүхий төсөл, хөтөлбөрүүдийг хэрэгжүүлэхэд чиглэсэн юм.

Нээлтэд МҮХАҮТ-ын гүйцэтгэх захирал Ц.Магнайбаатар оролцон, “Энэ удаагийн уулзалт нь Монгол, Хятадын бизнес эрхлэгчдийг холбох, харилцан туршлага солилцох, бодит хөрөнгө оруулалтыг дэмжих чухал талбар болж байна” хэмээн онцоллоо. Тэрбээр хоёр орны худалдаа, хөрөнгө оруулалтын хамтын ажиллагааг өргөжүүлэх, бизнесийн орчны тулгамдсан асуудлыг хамтран шийдвэрлэхэд ийнхүү тогтмол уулзалт, хэлэлцүүлэг чухал ач холбогдолтойг хэллээ.

Хоёр улсын эдийн засгийн хамтын ажиллагаа уул уурхайн салбарт голчлон төвлөрч байгаа бөгөөд худалдаа, хөрөнгө оруулалтын хэмжээ өссөн нь үүнийг баталж байна. Гэхдээ хамтын ажиллагаа зөвхөн уул уурхайгаас гадна хөдөө аж ахуй, хүнсний салбарт ч бодит ахиц гарч, Засгийн газруудын бодлогын уялдаа сайжирч, төрийн байгууллага хоорондын харилцаа идэвхтэй хөгжиж байгаа нь чухал байна.

Гэхдээ Монгол Улс татварын тогтолцоог тогтвортой, ойлгомжтой болгох, хөдөлмөрийн харилцаа болон хөдөлмөрийн хүчийг хамгаалах эрх зүйн орчныг сайжруулах, бизнесийн орчныг нийтэд нь сайжруулах шаардлагатай гэж үзэж байна. Ийм өөрчлөлтүүд хийгдвэл хоёр улсын худалдааны хэмжээ цаашид нэмэгдэж, эдийн засгийн хамтын ажиллагаа илүү өргөжинэ гэдгийг уулзалтад оролцогчид хэлж байлаа. 

Арга хэмжээнд Монголын 230 компани, Хятадын 60 компани оролцож, хамтын ажиллагааны бодит боломж, бизнесийн түншлэлийг хэлэлцсэн бөгөөд хоёр орны нээлттэй, харилцан ашигтай эдийн засгийн хамтын ажиллагааг бэхжүүлэх чухал алхам боллоо.

Монгол, Хятадын хоорондын экспорт, импортын хэмжээ 16.5 тэрбум ам.долларт хүрсэн бөгөөд энэ нь манай улсын нийт гадаад худалдааны 80 орчим хувийг эзэлж байна. Сүүлийн 10 жилийн хугацаанд энэхүү дүн 1 тэрбум ам.доллараас 16 тэрбум ам.доллар хүртэл өссөн дүнтэй байна.