“ENTREPRENEUR-2025” ШИЛДГҮҮД ТОДОРЛОО

2025/12/24 0

Монголын бизнесийн салбарын шилдэг энтрепренёр, аж ахуйн нэгжүүдийг салбар бүрээр шалгаруулсан “ENTREPRENEUR-2025” шагнал гардуулах ёслол амжилттай зохион байгуулагдлаа.

Арга хэмжээг нээж МҮХАҮТ-ыг Ерөнхийлөгч Б.Лхагважав хэлсэн үгэндээ, энэхүү арга хэмжээ нь бизнесийн салбарт өндөр амжилт гаргасан аж ахуйн нэгжүүдийг дэмжиж, эдийн засгийн өсөлт, салбарын хөгжилд манлайлсан байгууллагуудыг олон нийтэд сурталчлах зорилготой болохыг онцлов. Мөн сүүлийн жилүүдэд олон хүнд сорилтыг давж, үйл ажиллагаагаа өргөжүүлэн, энэхүү шалгаруулалтад 95 аж ахуйн нэгж 152 материал ирүүлснээс, 11.3 их наяд төгрөгийн хөрөнгө оруулалт хийж, 2.4 их наяд төгрөгийн татвар төлж, 7,600 гаруй ажлын байр шинээр бий болгож, компанийн 345.7 тэрбум төгрөгийг нийгмийн хариуцлагад зарцуулсан бизнес эрхлэгчдийн амжилтыг үнэхээр бахархмаар байгааг дурдлаа.

Энэхүү арга хэмжээний хүрээнд аялал жуулчлал, барилга, үйлдвэрлэл, худалдаа, үйлчилгээ, мэдээлэл технологи, санхүү, хөдөө аж ахуй зэрэг эдийн засгийн голлох салбаруудын манлай компаниуд тодорсон юм.

Эдгээр аж ахуйн нэгжүүд нь салбартаа тэргүүлэхийн зэрэгцээ эдийн засгийн өсөлтөд бодитой хувь нэмэр оруулж, тогтвортой ажлын байр бий болгож, татварын орлогыг нэмэгдүүлэх замаар нийгэм, эдийн засгийн хөгжилд чухал үүрэг гүйцэтгэж байна.

Мөн тогтвортой хөгжлийн зорилтыг хэрэгжүүлэгч, инновац нэвтрүүлэгч, бүс болон орон нутгийн энтрепренёрүүд шалгарч, байгальд ээлтэй технологи, үр ашигтай үйлдвэрлэлийн менежментийг нэвтрүүлснээр цэвэр орчин, тогтвортой үйлдвэрлэлийг дэмжиж буйгаа харууллаа.

Шагнал хүртсэн компаниуд нь хүний нөөцийн хөгжлийг дэмжиж, мэргэжлийн ур чадварыг нэмэгдүүлэхэд анхаарч, олон улсын зах зээлд өрсөлдөх чадвараа тасралтгүй сайжруулж буйгаараа онцлог юм.

Үүний зэрэгцээ татварын орлогоор дамжуулан орон нутгийн төсөв, нийгмийн үйлчилгээний санхүүжилтэд эерэг нөлөө үзүүлж байна.

“Гран При” Алтан Меркури шагналыг ТЭСО ГРУПП хүртлээ. ТЭСО Групп өдгөө 30 жилийн турш хүнсний үйлдвэрлэл, барилга бүтээн байгуулалт, хөрөнгө оруулалтын салбарт тогтвортой, амжилттай үйл ажиллагаа явуулж, Монгол Улсын нийгэм, эдийн засгийн хөгжилд бодит хувь нэмэр оруулсаар ирлээ. 2025 онд тус компани нь: Үйлдвэрлэлийн салбарт “Олон улсын жишиг экспортын үйлдвэрийн бүс” байгуулах томоохон бүтээн байгуулалтын төслийг хэрэгжүүлсэн бөгөөд Барилга, бүтээн байгуулалтын чиглэлд дулаан тусгаарлалтын дэвшилтэт шийдэл бүхий “Евро Базальт” дулаалгын материалын үйлдвэр ашиглалтад оруулсан байна. Мөн Байгальд ээлтэй, тогтвортой хөгжлийг эрхэмлэсэн Монголын анхны ногоон барилгын “Скай Парк Плаза” төслийг эхлүүлснээс гадна Хөрөнгө оруулалт, технологийн салбарт дэлхийн 57 улсад аюулгүй, найдвартай такси үйлчилгээ авах шинэ боломжийг бүрдүүлсэн “Tino” супер аппликейшныг нэвтрүүлсэн амжилттайгаар ажиллаж байна.

“ГРАН ПРИ” Алтан Меркури шагнал – ТЭСО ГРУПП

АЗИ НОМХОН ДАЛАЙН ОРНУУДЫН ХУДАЛДАА АЖ ҮЙЛДВЭРИЙН ТАНХИМУУДЫН ХОЛБООНЫ НЭРЭМЖИТ ШАГНАЛ ӨРГӨМЖЛӨЛ МӨНГӨН МЕРКУРИ /CACCI/ ШАГНАЛ: Мобиком Корпораци ХХК

ОНЫ ШИЛДЭГ АЖ АХУЙН НЭГЖ