Оюуны өмчийн мэдээллийн сангийн ач холбогдол

Оюуны өмчийн мэдээллийн сан нь шинэ бизнес эхлүүлэх, технологийн судалгаа хөгжүүлэлт хийх шатанд үнэ цэнтэй эх сурвалж болно.

Мэдээллийн санг ашигласнаар дараах давуу талууд бий.

1. Маргаанаас сэргийлэх

Жишээ нь “Star Coffee” нэртэй шинэ кофе шоп нээх гэж байгаа бол мэдээллийн сангаас шалгаж үзмэгц “Starbucks” гэх төстэй барааны тэмдэг нэг салбарт бүртгэлтэй байх тул зөрчил үүсэх эрсдэлтэйг урьдчилан мэдэж болно.

Ашиглах боломжтой мэдээллийн сан:

• МУ-ын Оюуны өмчийн газрын Аж үйлдвэрийн өмчийн мэдээллийн сан
  бүртгэл/мэдүүлгийн дугаараар, эрх эзэмшигчийн нэрээр, үгээр хайлт хийж болно.
• Дэлхийн оюуны өмчийн байгууллагын Global Brand Database
  дээрхээс ялгаатай нь дүрсээр, ангиллаар мөн улс орноор хайлт хийж болно.

2. Өрсөлдөгчөө судлах

Тухайлбал гар утасны апп хөгжүүлэгч компани мэдээллийн сангаас өрсөлдөгчийн ямар төрлийн оюуны өмчийн эрхүүд бүртгэлтэйг судласнаар, давхардал, зөрчлөөс сэргийлж өөрийн онцлог бүтээгдэхүүнийг хөгжүүлэх боломжтой.

3. Судалгаа хөгжүүлэлтэд ашиглах

Жишээ нь шинэ халаалтын төхөөрөмж бүтээсэн инженер өмнөх патентуудыг судалж, сайжруулалт хийн давтагдахгүй шинэ шийдлийг нэвтрүүлж болно. Ингэснээр туршилтын зардал, хугацаа хэмнэнэ.

4. Мэдлэг олох

Их сургуулийн багш, судлаач, оюутнууд оюуны өмчийн мэдээллийн сангаас үндэстэн дамнасан корпорациудын дэвшилтэт технологийн шийдлүүдийг судалж, сургалт, судалгаандаа ашиглах боломжтой.

Ашиглах боломжтой мэдээллийн сан:

• МУ-ын Оюуны өмчийн газрын Аж үйлдвэрийн өмчийн мэдээллийн сан
  зөвхөн Монгол Улсад бүртгэлтэй патентын мэдээллийг хайна.
• Дэлхийн оюуны өмчийн байгууллагын PATENTCSOPE
  олон улсын хэмжээнд нийтлэгдсэн патентын мэдээлэл
• Европын Холбооны оюуны өмчийн байгууллагын ESPACENET
  Европ болон бусад улс орнуудын патентын мэдээлэл

Анхааруулга: Улс орон бүр өөрийн мэдээллийн сантай тул экспортын зах зээлд нэвтрэх гэж байгаа бол тухайн улсын мэдээллийн сангаас урьдчилсан хайлт хийх шаардлагатай.

Нийтлэл бичсэн: С.Дүүрэнжаргал
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №068

МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Email: patenttmbur@mongolchamber.mn