ЗҮҮН ХОЙД АЗИЙН ОРНУУД ЧУУЛЖ БАЙНА
БНХАУ-ын Жилин мужийн Чанчун хотноо Хятад-Зүүн хойд Азийн 15 дахь удаагийн экспо нээлтээ хийлээ. “Зүүн хойд Азийн орнууд гар нийлж, нээлттэй байдлаар ирээдүйг цогцлооё” уриан дор болж буй тус үзэсгэлэнд дэлхийн 40 гаруй улс орны төлөөлөгчид оролцож байна.
Нээлтийн арга хэмжээнд Зүүн Хойд Азийн орнуудын төр, засгийн удирдлагууд болон Монгол Улсаас бизнес эрхлэгчдийг төлөөлөн МҮХАҮТ-ын Ерөнхийлөгч Б. Лхагважав тэргүүтэй баг хамтарсан салбар хуралдаануудад оролцож, үзэсгэлэнд тавигдсан БНХАУ-ын муж, хотуудын тусгай үзмэрүүдтэй танилцлаа.
Мөн үзэсгэлэнгийн үеэр Монгол Улсын УИХ-ын гишүүн Д.Цогтбаатар, ЭЗХЯ-ны Төрийн нарийн бичгийн дарга И.Батхүү болон бусад албаны хүмүүс үзэсгэлэнд Монголын талаас ноос ноолуур, арьс ширэн бүтээгдэхүүнээрээ оролцож буй бизнес эрхлэгчдийн бараа бүтээгдэхүүнийг үзэж танилцан санал солилцов.
Энэхүү үзэсгэлэн нь анх 2005 оноос эхэлсэн ба энэ хугацаанд Зүүн Хойд Азийн Улс орнууд нийт 100 тэрбум юанийн худалдаа, 3032 төсөл, 20.5 их наяд юанийн хөрөнгө оруулалтын гэрээг үзэглэсэн байна.
Хятад–Зүүн Хойд Азийн 15 дахь удаагийн үзэсгэлэн нь энэ сарын 31-ныг дуустал үргэлжлэх юм.
