Гадаад үзэсгэлэн, экспод шинэ загвар, бүтээгдэхүүнээр оролцож буй бизнес эрхлэгчдэд
Энэхүү нийтлэлийг Японы Осака хотод зохион байгуулагдаж буй “Дэлхийн экспо 2025”-той холбогдуулан нийтэлж байгаа бөгөөд тус экспод шинэ загварын бараа, бүтээгдэхүүнээр (шинэ бүтээлийн патент, ашигтай загварын патент, бүтээгдэхүүний загварын патент зэргээр оролцож байгаа) оролцох бизнес эрхлэгч Танд дараах оюуны өмчийн зөвлөмжийг хүргэе.
МУ-ын Оюуны Өмчийн Газарт (ОӨГ) патентаа бүртгүүлсэн эсвэл бүртгүүлэхээр төлөвлөж байгаа бол Патентын тухай хуульд “цоо шинэ байх” шалгуурыг тавьдаг. “Цоо шинэ байх” шалгуурт мэдүүлэг гаргагч өөрөө эсвэл бусад этгээд Монгол Улс болон гадаад улсад патентаа мэдүүлэхээс өмнө дараах нөхцлүүдийг хангасан байхыг шаарддаг. Үүнд:
- аман болон бичгэн хэлбэрээр нийтэд зарлаагүй байх;
- бараа бүтээгдэхүүнээ худалдан борлуулаагүй байх;
- зар сурталчилгаа хийгээгүй байх зэргийг ойлгоно.
Гэхдээ зарим онцгой тохиолдолд бараа, бүтээгдэхүүнээ хэрэглэгчдэд сурталчлан борлуулсан боловч цоо шинэ гэсэн шалгуурыг авч үлдэх боломжийг Патентын тухай хуулийн 21 дүгээр зүйлд тусгасан байдаг. Энэ бол “үзэсгэлэнгийн давамгайлах огноо” гэх ойлголт юм. Хэрэв Парисын конвенцын, эсхүл Дэлхийн худалдааны байгууллагын гишүүн аль нэг улсын нутаг дэвсгэрт зохиогдох албан ёсны үзэсгэлэн, экспод шинэ загварын бараа бүтээгдэхүүнээр оролцсон бол үзэсгэлэнгийн давамгайлах огноог ашиглан, патентаа “цоо шинэ” гэх шалгуурт тооцуулж болно. Харин давамгайлах эрхийг эдлэхийн тулд Патентын тухай хуульд заасан дараах хугацааг баримтлах шаардлагатай.
- Мэдүүлэг гаргагч нь Парисын конвенцын, эсхүл Дэлхийн худалдааны байгууллагын гишүүн улсын нутаг дэвсгэрт зохион байгуулагдсан албан ёсны болон албан ёсоор хүлээн зөвшөөрөгдсөн олон улсын үзэсгэлэнд шинэ бүтээл, ашигтай загварыг нийтэд дэлгэсэн бол нийтэд дэлгэсэн өдрөөс хойш 12 сарын дотор үзэсгэлэнгийн давамгайлах эрх хүсэж болно.
- Мэдүүлэг гаргагч нь Парисын конвенцын, эсхүл Дэлхийн худалдааны байгууллагын гишүүн улсын нутаг дэвсгэрт зохион байгуулагдсан албан ёсны болон албан ёсоор хүлээн зөвшөөрөгдсөн олон улсын үзэсгэлэнд бүтээгдэхүүний загварыг нийтэд дэлгэсэн бол нийтэд дэлгэсэн өдрөөс хойш 6 сарын дотор үзэсгэлэнгийн давамгайлах эрх хүсэж болно.
Жишээ нь А компани 2025 оны 4-р сарын 22-ны өдөр Японы “Дэлхийн экспо 2025”-д шинэ загварын бүтээлээ нийтэд дэлгэсэн гэж үзвэл та 2025 оны 10-р сарын 22-ны өдрийн дотор ОӨГ-т патентын мэдүүлгийг гаргахдаа үзэсгэлэнгийн давамгайлах огноог ашиглан, 2025 оны 4-р сарын 22-ны өдөр ОӨГ-т мэдүүлэг гаргаснаар тооцуулж болох юм.
Иймд олон улсын гэрээ, конвенци, дотоодын хууль тогтоомжид заасан боломжуудыг бизнес эрхлэгч та өөрт ашигтайгаар ашиглаж, оюуны өмчөө хамгаалахыг зөвлөе.
Нийтлэл бичсэн: С.Дугармаа
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №119
МҮХАҮТ-ын Оюуны өмчийн төв
Утас: 77277070-8
Email: patenttmbur@mongolchamber.mn
