Барааны тэмдгийн хүчинтэй хугацааг Хуульд заасан хугацаанд сунгуулаагүй бол оюуны өмчийн онцгой эрх дуусгавар болно

Монгол Улсын хуульд барааны тэмдгийн эрхийн хүчинтэй байх хугацааг 10 жил гэж заасан бөгөөд хэрэв та 2015 онд барааны тэмдгээ бүртгүүлсэн бол энэ ондоо багтаан барааны тэмдгийн онцгой эрхийг сунгуулах шаардлагатай юм. Бусад оюуны өмчийн төрлөөс (зохиогчийн эрх, хамаарах эрх, шинэ бүтээлийн патент, ашигтай загварын патент, бүтээгдэхүүний загварын патент гэх мэт) ялгаатай нь барааны тэмдгийн хүчинтэй байх хугацааг 10 жилд тутамд сунгах бололцоотой байдаг нь танд барааны тэмдгийг 10, 20 жил, цаашлаад 50, 60 жил ч оюуны өмчийн онцгой эрхтэйгээр эзэмших боломжийг олгоно.

Тэгвэл та барааны тэмдгийн хүчинтэй хугацааг сунгуулахын тулд энэ тухай хүсэлтийг заавал МУ-ын Оюуны өмчийн газарт хүргүүлэх шаардлагатай ба ингэхдээ Хуулийн хугацаанд багтаах ёстойг мартуузай.  

Барааны тэмдгийн хүчинтэй хугацааг дуусгавар болох сүүлийн нэг жилийн дотор, эсвэл хугацаа дуусгавар болсноос хойш хөнгөлөлтийн 6 сарын хугацаанд сунгах боломжтой.

Хүчинтэй хугацааг барааны тэмдгийн гэрчилгээнээс харах боломжтой бөгөөд хэрэв гэрчилгээнээс харах боломжгүй тохиолдолд МҮХАҮТ-ын Оюуны өмчийн төвийн patenttmbur@mongolchamber.mn хаягт барааны тэмдгийн төлөв шалгуулах тухай хүсэлтийг илгээж цаг алдалгүй мэдээлэл, зөвлөгөө аваарай. Ингэхдээ барааны тэмдгийн эрх эзэмшигчийн нэр, барааны тэмдгийн нэр, улсын бүртгэлийн дугаар, мэдүүлгийн дугаар зэргийг дурдана уу.

Нийтлэл бичсэн: С.Дугармаа
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №119

МҮХАҮТ-ын Оюуны өмчийн төв
Утас: 77277070-8
Email: patenttmbur@mongolchamber.mn