Фото: "Эмэгтэйчүүдийн эдийн засгийн оролцоог нэмэгдүүлэх нь" 21 аймгийн зөвлөлдөх уулзалтыг зохион байгуулж байна
МҮХАҮТ-ын дэргэдэх Бизнес эрхлэгч эмэгтэйчүүдийн зөвлөлөөс зохион байгуулж буй "Эмэгтэйчүүдийн эдийн засгийн оролцоог нэмэгдүүлэх нь" 21 аймгийн зөвлөлдөх уулзалтад нийслэл, орон нутгийн 240 гаруй бизнес эрхлэгч оролцож байна.
Уулзалтыг нээж МҮХАҮТ-ын Ерөнхий нарийн бичгийн дарга С.Баясгалан үг хэлж, МҮХАҮТ-ын үйл ажиллагаа, стратеги зорилтуудын талаар танилцуулав. Мөн МҮХАҮТ-ын дэргэдэх Бизнес эрхлэгч эмэгтэйчүүдийн зөвлөлийн дарга Б.Мөнхзул тус зөвлөлийн үйл ажиллагааны талаар мэдээлэл хийлээ.
Эдийн засгийн бодлого, өрсөлдөх чадварын судалгааны төвийн захирал Б.Лакшми "Эмэгтэйчүүдийн эдийн засгийн оролцоог нэмэгдүүлэх хуулийн товч танилцуулга", ХНХХЯ-аас "Монгол Улсад хэрэгжиж буй хөдөлмөр эрхлэлтийг дэмжих хөтөлбөрүүдийн танилцуулга", ЖДҮГ-ын Бодлого зохицуулалтын хэлтсийн дарга А.Гэрэлзаяа "Жижиг дунд үйлдвэрлэлийг дэмжих сангийн үйл ажиллагаа, бодлогын танилцуулга" хийсний дараагаар "Бизнес эрхлэгч эмэгтэйчүүдийн манлайлал, оролцоо" хэлэлцүүлгийг зохион байгуулав.
МҮХАҮТ-ын дэргэдэх Бизнес эрхлэгч эмэгтэйчүүдийн зөвлөл нь эгнээндээ 1100 гаруй бизнес эрхлэгч, захирлуудыг нэгтгэсэн зөвлөл юм.
МҮХАҮТ-ын дэргэд 20 салбар бүхий бизнесийн зөвлөл үйл ажиллагаа явуулдаг бөгөөд Зөвлөлүүд нь тухайн салбарын хууль эрхзүйн орчин, эдийн засаг, бизнестэй холбоотой бодлогын болоод бизнесийг дэмжин урамшуулах асуудалд салбарынхаа нийтлэг эрх ашгийг хамгаалан төлөөлөх МҮХАҮТ-ын үйл ажиллагаанд дэмжлэг үзүүлэх чиг үүрэгтэйгээр ажиллаж байна.