БНХАУ-ын Гадаад хэргийн сайд Ван И-гийн айлчлал худалдаа, эдийн засгийн харилцаанд түүхэн үүрэг гүйцэтгэх өндөр хүлээлт дагуулж байна
Гадаад харилцааны сайд Б.Батцэцэгийн урилгаар Бүгд Найрамдах Хятад Ард Улсын Төрийн зөвлөлийн гишүүн, Гадаад хэргийн сайд Ван И Монгол Улсад албан ёсны айлчлал хийж байна. Цар тахлын улмаас хилийн боомтуудын хэвийн үйл ажиллагаа тасалдаж, экспорт буурч, ачаа тээврийн үнэ нэмэгдэж, томоохон төслүүдийн хэрэгжилт удаашралтай байгаа энэхүү цаг үед хийж буй түүний айлчлал эдийн засагт чухал хүлээлтүүдийг үүсгээд байна.
Тодруулбал, Түүний айлчлалын үеэр талууд худалдаа, эдийн засгийн хамтын ажиллагааг идэвхжүүлэх, БНХАУ-ын буцалтгүй тусламж, хөнгөлөлттэй зээлийн хөрөнгөөр хэрэгжиж буй бүтээн байгуулалтын төслүүдийн хэрэгжилтийг түргэсгэх, хилийн боомтуудын үйл ажиллагааг идэвхжүүлэх асуудлаар ярилцаж, Хоёр улсын Гадаад харилцааны яамдын 2023-2024 онд хамтран хэрэгжүүлэх үйл ажиллагааны төлөвлөгөө, Хилийн хорио цээрийн асуудлаар хамтран ажиллах тухай болон Гашуунсухайт-Ганцмод хооронд хил дамнасан төмөр замын холболтын тухай харилцан ойлголцлын санамж бичгийг ёсчлон баталсан нь эдийн засгийн өндөр ач холбогдолтой юм.
2022 оны эхний 7 сарын байдлаар Монгол Улсын нийт экспортын 84.2% буюу 5,443.2 сая ам.долларын бараа бүтээгдэхүүнийг БНХАУ-руу экспортолсон байна. Хилийн боомтын үйл ажиллагааг эрчимжүүлснээр хоёр улсын худалдааны эргэлт нэмэгдэж, экспортын гол бараа бүтээгдэхүүн болох нүүрсний экспорт, дамжин өнгөрөх тээврийн хэмжээ цаашид улам өсөн нэмэгдэх бодит үр дүн хүлээгдэж байна. Тэрчлэн худалдааны саад тотгор арилж, харилцан ашигтай хамтын ажиллагаа өрнүүлэх боломж үүгээр бүрдэх юм.
Үүнээс гадна цар тахлын нөлөө, ОХУ-Украины хооронд үүссэн хямралт байдал, олон улсын харилцаанд бий болсон тодорхой бус нөхцөл гээд ихээхэн ээдрээтэй энэхүү цаг үед хөрш улстайгаа үр ашигтай хамтран ажиллаж чадвал эдийн засгийн хувьд маш том боломж бий болох юм.