МҮХАҮТ-ын дарга Т.Дүүрэн Малайзын Дунд хэмжээний компаниудын консорциум (MCMTC)-ын төлөөлөлтэй цахим уулзалт хийлээ
Цахим уулзалтад Малайзын дунд хэмжээний компаниудын консорциумын Ерөнхийлөгч ноён Каллум Чен, Дэд ерөнхийлөгч ноён Мартин Анг тэргүүтэй албан тушаалтнууд оролцож, хамтын ажиллагааны талаар санал солилцов. МҮХАҮТ-ын дарга Т.Дүүрэн цар тахал, цаг үеийн нөхцөл байдлын улмаас Монгол Улсын гадаад худалдаа, тээвэр логистикт доголдол үүсээд байгаа энэ үед гадаадын хөрөнгө оруулалтыг татах, гуравдагч хөршийн бизнесийн хамтын ажиллагааг дэмжиж ажиллах нь ихээхэн ач холбогдолтой гэдгийг онцоллоо.
Малайзын дунд хэмжээний компаниудын консорциумын Ерөнхийлөгч ноён Каллум Чен МҮХАҮТ нь бизнесийг дэмжигч байгууллагын хувьд хоёр улсын бизнес хооронд холбоо, харилцаа тогтоох гүүр болж буйд талархал илэрхийлж, цаашид хоёр улсын худалдаа, эдийн засгийн хамтын ажиллагаа улам өргөжнө гэдэгт итгэл дүүрэн байна гэв.
Малайз Улсын 20 гаруй компани 2022 оны 9 дүгээр сарын 22-25-ны өдрүүдэд “Мишээл экспо” төвд зохион байгуулагдах “Улаанбаатар Түншлэл” Олон улсын үзэсгэлэн яармагт бүтээгдэхүүн, үйлчилгээгээ танилцуулж, бизнесийн хамтын ажиллагаа эрэлхийлэн оролцохоор болсон юм.