МҮХАҮТ-ын Ерөнхийлөгч О.Амартүвшин НҮБ-ын Суурин зохицуулагч Тапан Мишраг хүлээн авч уулзлаа

2022/07/19 0

“Алсын хараа-2050” Монгол Улсын урт хугацааны хөгжлийн бодлогод тусгасан үндэсний хөгжлийн тэргүүлэх чиглэлүүд, Тогтвортой хөгжлийн зорилгууд болон олон улсад хүлээн зөвшөөрөгдсөн хөгжлийн болон хүний эрхийн бусад зорилт, үүрэг амлалтыг биелүүлэхэд Монгол Улсын Засгийн газар болон Нэгдсэн Үндэстний Байгууллага хамтран ажиллахаа 2022 оны 5 сарын 20-ны өдөр баталсан.

Энэхүү ажлын хүрээнд 2022 оны 7-р сарын 18-ны өдөр МҮХАҮТ-ын Ерөнхийлөгч О.Амартүвшин Нэгдсэн Үндэсний Байгууллага (НҮБ)-ын Суурин зохицуулагч Тапан Мишраг хүлээн авч уулзлаа.

Уулзалтаар “Тогтвортой Хөгжлийн 2030 хөтөлбөр”-ийн хэрэгжилтийн явц, тус хөтөлбөрийг хэрэгжүүлэхэд НҮБ-ын хөгжлийн системээс үзүүлж буй дэмжлэг болон НҮБ-ын Тогтвортой Хөгжлийн хамтын ажиллагааны хүрээ 2023-2027 баримт бичгийг хэрэгжүүлэх төлөвлөгөө зэрэг асуудлаар харилцан санал солилцлоо.

“Тогтвортой Хөгжлийн хамтын ажиллагааны хүрээ 2023-2027” баримт бичиг дараах 3 гол асуудлыг хөндөнө. Үүнд:

Хүн болон хүний хөгжил
Оролцоог хангасан Ногоон хөгжил
Засаглал ба Манлайлал

Цаашид МҮХАҮТанхим нь Тогтвортой хөгжлийн зорилгыг олон нийтэд сурталчлан таниулах, өнөөг хүртэл хэрэгжүүлж ирсэн сайн туршлага, шинэлэг санаачилга, хөгжлийн шийдлийг түгээн дэлгэрүүлж, урамшуулах зэргээр МУ дах бизнесийн төлөөллийн төв байгууллагын зүгээс манлайлан ажиллана гэдгээ МҮХАҮТ-ын Ерөнхийлөгч О.Амартүвшин илэрхийллээ.