Инклусив хамтын ажиллагаа
Улс төрийн тодорхойгүй байдал, зах зээлийн шударга бус өрсөлдөөн Монголын эдийн засаг, бизнесийн салбарын бүтээмж, өгөөжийн боломжийг хавчих нөхцөл болж байгаатай санал нэгдэж буйгаа МҮХАҮТ-ын Ерөнхийлөгч Д.Энхтүвшин, НҮБ-ын Суурин төлөөлөгч Тапан Мишра нар илэрхийлээд хоёр байгууллагын хамтран ажиллах боломжуудын талаар уулзаж ярилцлаа.
Уулзалтын үеэр бизнесийн гэлтгүй Монгол Улсын эдийн засагт голлох үүрэг гүйцэтгэдэг салбарууд хоорондын уялдаа холбоо бүхий мэргэжлийн хамтын ажиллагаа чухал гэдгийг МҮХАҮТ-ын Ерөнхийлөгч онцлоод “Төр, хувийн хэвшлийн хамтрал алсарсаар байгаа энэ байдал даамжирах нь зах зээлийн тэгш бус оролцоо, шийдвэр гаргалт тэнцвэргүй байх зэрэг нөхцөлийг бүрдүүлж байгаа юм. Энэ байдал сүүлийн 20 гаруй жил үргэлжилж байна. Үүнийг халахын тулд Танхим онцгой анхаарч ажиллаж байна. Ойлголцол тодорхой бус байна. Иймд бүх талын тогтвортой оролцоог хангах нь чухал” хэмээсэн.
Мэдээлэлтэй ойр бүлэг хүмүүс гэхээс илүүтэй нээлттэй, ил тод зарчмаар үйл ажиллагаа явуулснаар хүртээмжтэй байдлыг нэмэгдүүлэх, өсөлт бий болгох боломж бүрдэнэ. Ийм ч учраас төр, хувийн хэвшлийн тэгш бус оролцоо, шийдвэр гаргалтыг тэнцвэржүүлэх, энтрепренерүүдийг дэмжих, нийтлэг эрх агшийг бий болгож хамгаалах зэргийг МҮХАҮТ-ын хуулийн шинэчлэлд багтаан хэрэгжүүлэх ажлыг эхлүүлсэн талаар Танхимын Ерөнхийлөгч Д.Энхтүвшин ярьлаа.
НҮБ-ын Суурин төлөөлөгч Тапан Мишра “Салбар хоорондын гүүр болдог танай байгууллагатай хамтран ажиллах боломжуудыг эрэлхийлж, түншлэхэд бэлэн байна. Бид МҮХАҮТ-аас гарж буй саналуудыг дэмжиж байгаа төдийгүй бизнесийн бүтцийн экосистемийг бий болгох ажилд өөрсдийн зүгээс дэмжиж ажиллахдаа таатай байх болно” гэсэн юм. Мөн тэрбээр Монгол Улсад эдийн засгийн асар их боломж байгаа ч хууль эрх зүйн орчны идэвхгүй, сул байдал зах зээлд шударга бус өрсөлдөөний суурь болж байгааг дурдлаа. “Аль ч салбарт төлөвлөлт, бэлтгэл ажил зайлшгүй хэрэгтэй. Үүнийг хийлгүй явж болохгүй. Тэгэхээр модулиа бий болгож, чадавхаа тодорхойлоод системтэйгээр ажиллах нь үр дүнтэй. Ингэснээр тогтвортой хамтын ажиллагаа бүрдэж сайн засаглал тогтож, улмаар эдийн засгийн хүртээмж тэлнэ” гэдгийг ноён Тапан Мишра тодотгосон.
