МҮХАҮТ-ын Ерөнхийлөгч О.АМАРТҮВШИН: МҮХАҮТ-ын гишүүн байгууллагууд, Удирдах зөвлөл, Тэргүүлэгч гишүүд та бүхний амрыг эрэн мэндчилье

2019-2023 онд Монголчууд бид бүхэн цар тахлын үеийн өндөржүүлсэн бэлэн байдал, хөл хорионы улмаас олон асуудал, бэрхшээлтэй нүүр тулж, ОХУ болон Украин хоорондын дайнаас үүссэн геополитикийн тодорхойгүй нөхцөл байдалд худалдаа бизнест томоохон сорилтууд тулгарсан хүнд цаг үеийг хамтдаа даван тууллаа. Бид бүхэн хамтарч юуг хийж бүтээснээ дүгнэж цаашид яах ёстойгоо ярилцах цаг үе бидэнд ирээд байна.

Монгол Улс цар тахлын ул мөр, геополитикийн шинэ нөхцөл байдал болон төсвийн үр ашиггүй байдал, төрийн хэт оролцоо, хавтгайрсан халамж, авлигалын томоохон хэргүүд гээд эдийн засаг, нийгмийн олон ужиг асуудлыг шийдвэрлэхийн тулд эрс шинэчлэл хийх зайлшгүй шаардлага тулгарсан түүхэн цаг үед МҮХАҮТ-ын 21 дүгээр их хурал болж байна.

МҮХАҮТ-ын гишүүд, үйлчлүүлэгчид, бизнес эрхлэгчид, хамтран ажилласан байгууллагуудад танхимын удирдлага, хамт олны нэрийн өмнөөс гүн талархал илэрхийлж, сайн сайхныг хүсье.