900 мянга гаруй ажлын байр бий болгож буй жижиг дунд үйлдвэрлэлээ дэмжиж, эх оронч худалдан авалт хийхийг уриаллаа
Нийслэлийн Засаг даргын санаачилгаар үндэсний уламжлалт сар шинийн баярыг угтан зохион байгуулж буй “Амар байна уу 2023" өргөтгөсөн үзэсгэлэн, худалдаагаар УИХ-ын дарга Г.Занданшатар, МҮХАҮТ-ын Ерөнхийлөгч О.Амартүвшин нар зочлов.
Монгол Улсын хэмжээнд жижиг дунд үйлдвэрлэл, үйлчилгээний салбарт 62 мянган аж ахуйн нэгж, 906 мянган хүн ажиллаж байна. Үүний 43 мянган аж ахуйн нэгж (678 мянган ажлын байр) нийслэл Улаанбаатар хотод үйл ажиллагаагаа эрхлэн явуулдаг. “Амар байна уу” үзэсгэлэн худалдаанд 21 аймаг, 9 дүүргийн 1000 гаруй жижиг, дунд үйлдвэр, үйлчилгээ эрхлэгч оролцож байна гэж Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөн танилцуулав.
УИХ-ын дарга Г.Занданшатар хэлсэн үгэндээ Монголчууд сар шинийн баяраар 1,3 их наяд төгрөгийн бараа бүтээгдэхүүний худалдан авалт хийдэг, үүний 1 их наяд орчим төгрөгөөр импортын бараа бүтээгдэхүүн худалдан авдаг гэсэн судалгаа байна. Тиймээс 900 мянга гаруй ажлын байр бий болгож буй жижиг дунд үйлдвэрлэлээ дэмжиж, эх оронч худалдан авалт хийхийг уриалж байна. Эх оронч худалдан авалт бол Монгол хүний ажлын байрыг дэмжиж буй санаачилга гэв.
МҮХАҮТ-ын Ерөнхийлөгч О.Амартүвшин “Тухайн улс үндэстний баяр гэдэг эдийн засгийн эргэлтийг дэмждэг том арга хэмжээ байдаг. Нийт ажлын байрны 70 гаруй хувийг жижиг дунд үйлдвэрлэл, үйлчилгээний салбарын аж ахуйн нэгжүүд бий болгож байна. Энэ ажлын байр баталгаажиж байж эдийн засаг баталгаажна. УИХ-ын даргын зүгээс үндэсний үйлдвэрлэл эрхлэгчдийг дэмжих, дотооддоо үйлдвэрлэсэн бараа, бүтээгдэхүүнийг худалдан авах зорилгоор “Үндэсний үйлдвэрлэлээ дэмжье, Үндэсний мөнгөн тэмдэгтээ дэмжье” уриалга гаргаж байгааг МҮХАҮТ талархан хүлээн авч байна” гэж хэллээ.
“Амар байна уу 2023" өргөтгөсөн үзэсгэлэн худалдаа түрээсийн төлбөргүй учраас үйлдвэрлэгчдэд хямд үнээр бараа бүтээгдэхүүнээ борлуулах боломжийг олгож байна. Үзэсгэлэн Дүнжингарав худалдааны төвөөс зүүн тийш "Шинэ зуун айл худалдааны төв"-д өдөр бүр 10:00-20:00 цагт зохион байгуулагдах бөгөөд 2 сарын 20-ны өдрийг дуустал үргэлжилнэ.
