МҮХАҮТ-ын Орлогч дарга Б.Намжилсүрэн Дорнын Бүгд Найрамдах Уругвай Улсын Элчин сайдыг хүлээн авч уулзлаа
Монголын үндэсний худалдаа, аж үйлдвэрийн танхимын Орлогч дарга Б.Намжилсүрэн Дорнын Бүгд Найрамдах Уругвай Улсаас Монгол Улсад хавсран суугаа Элчин сайд ноён Фернандо Лугрис-ийг 12 дугаар сарын 07-ны өдөр хүлээн авч уулзлаа. Монгол Улс, Уругвай Улс хооронд дипломат харилцаа тогтоосны 25 жилийн ой энэ онд тохиож байгаа юм. Элчин сайд ноён Фернандо Лугрис уулзалтын үеэр хоёр улсын харилцаа, хамтын ажиллагаа өнгөрсөн 25 жилийн хугацаанд тогтвортой хөгжиж байгааг тэмдэглээд, худалдаа, эдийн засгийн салбарт, тэр дундаа хөдөө аж ахуй, сэргээгдэх эрчим хүчний салбарт илүү хөгжих боломж байгааг дурдлаа.
Мөн МҮХАҮТ-тай Ковид-19 халдварт цар тахлын өмнө эхлүүлсэн хоёр талын хамтын ажиллагааг идэвхжүүлэх хүсэлтэй байгаагаа илэрхийллээ. Орлогч дарга Б.Намжилсүрэн ноён Элчин сайдыг МҮХАҮТ-д хүрэлцэн ирсэнд талархал илэрхийлж, Уругвайн талтай хамтын ажиллагааг сэргээхэд МҮХАҮТ бүх талаар дэмжин ажиллахад бэлэн байгааг дурдлаа. Уругвай улс нь 3.48 сая хүн амтай, хөдөө аж ахуйн салбар, экспортод тулгуурласан эдийн засгийг хөгжүүлсэн Өмнөд Америк тивийн улс бөгөөд тус улсын голлох экспорт нь үхрийн мах, хүнсний ногоо, бяслаг, цөцгийн тос зэрэг сүүн бүтээгдэхүүн, химийн бүтээгдэхүүн, цагаан будаа ажээ. Зарим тоо баримтаас дурдахад, тус улс 2020 онд 11.8 сая толгой үхэр, 6.3 сая толгой хонь тоолуулсан бол үхрийн махны экспорт нь 1,593 тэрбум ам.доллар байжээ. Үхрийн махны экспортын 47 хувийг (749 сая ам.доллар) БНХАУ руу, 19 хувийг (304 сая ам.доллар) АНУ руу, 15 хувийг (233 сая ам.доллар) тус тус гаргажээ. Элчин сайд ноён Фернандо Лугрис нь 2015 оноос Дорнын Бүгд Найрамдах Уругвай Улсаас БНХАУ-д суугаа Элчин сайдаар томилогдсон бөгөөд 2016 оноос Монгол Улсад хавсран суух элчин сайдаар ажиллаж байна.
