Бизнесийн ёс зүйн холбогдолтой гомдлыг хэрхэн шийдвэрлэх вэ?

Бизнесийн  ёс зүйн дүрмийг аливаа байгууллага үйл ажиллагаандаа нэвтрүүлэхдээ өөрсдийн үйл ажиллагааны эрсдэлийг үнэлэх , үйл ажиллагаа, алсын хараа, үнэт зүйлстэйгээ уялдуулан боловсруулан баталж, бодитоор хэрэгжүүлж ажиллах нь чухал юм.

Бодитоор хэрэгжүүлнэ гэдэг нь байгууллагын ёс зүйн дүрмийг нийт ажилтнууд нь мэддэг, удирдлагууд нь манлайлан үлгэрлэдэг, зөвхөн биеэрээ манлайхах бус бүтэц, төсөв гаргаж эрх мэдэл олгох, ёс зүйн дүрмийн хүрээнд юу хийж болох болон юуг хийж болохгүйгээ бүрэн ойлгодог, эрсдэл үүссэн нөхцөлд мэдээлдэг, гомдол мэдээллийг хянан шалгаад, шийдвэрлэдэг ил тод тогтолцоо бүрдсэн байхыг хэлнэ.

Ёс зүйн дүрмийг үйл ажиллагаандаа шингээж, байгууллагын соёл болгон тогтоохын тулд олон удаагийн төвшин бүрд зориулсан сургалтууд, нээлттэй ил тод байлгах зэргээс гадна “Шүгэл үлээх тогтолцоо” буюу  ирсэн мэдээлэл гомдлыг шударгаар шийдвэрлэх, шийдвэрийг буцаан мэдээлэх тогтолцоог бүрдүүлэх нь чухал.

Үйл ажиллагааны талаар, бизнесийн ёс зүйн холбогдолтой санал гомдол хүлээж авах нь оролцогч талуудаасаа суралцах, ажлынхаа чанарыг сайжруулах, хөгжиж дэвших боломж гэж харж болно.  Гомдол шийдвэрлэх бодлогодоо анхаарах түлхүүр зарчмуудыг санал болгож байна.

Аливаа гомдлыг зорилго, алсын хараа, үнэт зүйлсийн эсэргүүцэл гэж хүлээж авч болохгүй.

1. Бүх гомдлыг бүртгэж хянаж байх хэрэгтэй.
2. Харилцан хүндэтгэх зарчмыг баримтална.
3. Цаг хугацаандаа гомдлыг шийдвэрлэнэ.
4. Нууцлалыг хадгална.

Та гомдолдоо дараах мэдээллийг тусгавал зохино.

• Овог нэр, хаяг, цахим шуудан, холбогдох утас
• Гарсан зөрчлийн талаарх ерөнхий мэдээлэл
• Болсон явдлын талаарх мэдэж байгаа дэлгэрэнгүй мэдээлэл, хэрхэн олж мэдсэн бэ? /Хэн холбоотой, хэн хариуцлага хүлээх вэ? Өөр хэн хамааралтай вэ? Тухайн үйл явдал хэзээ хаана болсон бэ? Бусад мэдээлэл зэрэг/
• Таны гаргасан гомдолд таны хүлээлттэй байгаа шийдвэрлэх санал.

Ихэнх тохиолдолд гомдол хүлээн авч, бүртгэж, гомдлын шийдвэрлэлтийн явцыг хянадаг. Маш ховор тохиолдолд гомдолд хариу арга хэмжээ авахаас татгалзаж болно. Үүнд:

• Гомдол нь доромжилсон дайрсан байдалтай бол
• Гомдол нь ажилтан албан хаагчдыг дарамталсан шинжтэй бол
• Гомдол авцалдаагүй, эсвэл ойлгомжгүй бол
• Өмнө нь хариу арга хэмжээ авсан асуудлыг дахин сөхсөн бол татгалзаж болно.

Дүгнэж хэлэхэд, гомдлыг шийдвэрлэх тохиромжтой тогтолцоог байгууллагадаа бий болгох нь байгууллагын сайн менежментийн нэг хэсэг бөгөөд талууд, оролцогчдын харилцааг сайнаар хадгалахын тул гомдлыг үр дүнтэй, цаг хугацаанд нь шийдвэрлэж байх нь чухал болно. Энэ нь тасралтгүй сайжруулах хэрэгсэл гэж ойлгож болно.