Мэдээлэл холбооны операторуудын ассоциацитай уулзлаа
МҮХАҮТ-ын Ерөнхийлөгч Д.Энхтүвшин Мэдээлэл холбооны операторуудын ассоциацийн удирдлага, гишүүдтэй уулзалт хийлээ. Уулзалтын үеэр ассоциацийн ерөнхийлөгч бөгөөд УЗ-ийн дарга Б.Мөнхбат холбооны үйл ажиллагаа болон салбарын өнөөгийн нөхцөл байдлын талаар танилцуулав.
Тус холбоо 2017 оноос өнөөг хүртэл идэвхтэй үйл ажиллагаа явуулж байгаа бөгөөд салбарынханд тулгарч буй асуудалд гишүүд нэгдсэн санал боловсруулж холбогдох арга хэмжээг авч хэрэгжүүлдэг талаар ярьж байв. Салбарт тусгай зөвшөөрөлтэй 720 гаруй аж ахуйн нэгж үйл ажиллагаа явуулж нийт 600 гаруй лицензийг эзэмшдэг. 12000 гаруй ажлын байрыг бий болгодог энэ салбар Монгол улсын эдийн засагт хувь нэмрээ чамгүй оруулдаг билээ.
МҮХАҮТ-ын Ерөнхийлөгч Д.Энхтүвшин бизнесийн орчинд тулгамдаж буй асуудлууд, салбарын асуудлыг шийдвэрлэхэд бизнес эрхлэгчид, холбоодын дуу хоолой сул байгааг дурдаад илүү хүчтэйгээр төрд асуудлаа дэвшүүлж шийдвэрлүүлэхийн тулд салбаруудын мэргэжлийн холбоод нэгдэж нэгдмэл байр суурьтай болох хэрэгцээ, шаардлага байгааг хэлэв.
Талууд хоорондын хамтын ажиллаагааг тэлэх, танхимаас санаачилж буй аливаа үйл ажиллагааг тус холбооны зүгээс дэмжин ажиллахаа илэрхийллээ.
