МҮХАҮТ Аялал жуулчлалын мэргэжлийн холбоотой санамж бичиг байгууллаа
Монголын Үндэсний Худалдаа Аж Үйлдвэрийн Танхим, Аялал жуулчлалын мэргэжлийн холбоотой хамтын ажиллагааны санамж бичиг байгууллаа. Санамж бичгийг МҮХАҮТ-ыг төлөөлж гүйцэтгэх захирал Т.Дүүрэн, Аялал жуулчлалын мэргэжлийн холбоог төлөөлж Ерөнхийлөгч Т.Баатарсайхан нар байгууллаа.
Санамж бичгийн хүрээнд аялал жуулчлалын салбарт бизнес эрхлэх таатай орчныг бүрдүүлэх, аялал жуулчлалын салбараар дамжуулан уул уурхайн бус экспортыг нэмэгдүүлэх, олон улсад Монгол Улсыг сурталчлах, олон улсын болон дотоодын байгууллагуудын уялдаа холбоог хангах, талуудын гишүүд хоорондын хамтын ажиллагааг дэмжих чиглэлээр ажиллах юм.
Энэ үеэр МҮХАҮТ-ын гүйцэтгэх захирал Т.Дүүрэн хэлэхдээ “Бидний хувьд уул уурхайн бус экспорт, үүн дотроо аялал жуулчлалын салбарыг хөгжүүлэх нь ажлын байрыг бий болгох, иргэдийн орлогыг дэмжих томоохон ач холбогдолтой гэж үздэг. Тиймээс үргэлж энэ салбарын үйл ажиллагааг эрчимжүүлж, орлогыг нэмэгдүүлэхийн төлөө ажиллаж ирсэн.
Бүхнийг төр хийдэг биш хувийн хэвшил өөрөө гардаж хийгээд салбарын асуудлаа өөрсдөө тавьж, шалгуураа бий болгодог байх ёстой. Өнөөдрийн энэ санамж бичиг бол энэ чиглэл рүү явж байгаа хамтын ажиллагаа юм” гэлээ.
