"Нийтийн хөлбөмбөг" төслийн нээлт боллоо
Монгол Улсын Ерөнхийлөгчийн ивээл дор Хөлбөмбөгийн спортыг хөгжүүлэх “Нийтийн хөлбөмбөг” төслийн нээлт өнөөдөр болж, МҮХАҮТ-ын Ерөнхийлөгч О.Амартүвшин оролцлоо.
Хөлбөмбөгийн салбарыг бизнес эрхлэгчидтэй холбох олон талт хамтын ажиллагааг хөгжүүлэх зорилгоор МҮХАҮТ, Монголын Хөлбөмбөгийн Холбоо хооронд хамтын ажиллагааны “Санамж бичиг” байгуулж, олон арга хэмжээг зохион байгуулахаар төлөвлөн ажиллаж байна.
“Нийтийн хөлбөмбөг” төслийн гол зорилго нь хүүхэд залуучуудын сонирхлыг хамгийн ихээр татсан дэлхийн №1 спорт болох хөл бөмбөгийн спортыг түгээн дэлгэрүүлэх, бүх нийтийн биеийн тамирыг хөгжүүлэх, хүүхэд залуусыг уг спортоор хичээллэх боломж бололцоогоор хангах, бааз суурийг бэхжүүлэхэд оршиж байгаа аж.
Энэхүү арга хэмжээний үеэр бүх оддын тоглолт, өсвөрийн хөлбөмбөгийн аварга шалгаруулах тэмцээн, урлаг соёлын арга хэмжээнүүд тус тус зохион байгуулагдах бөгөөд хөл бөмбөгийн талбайн зэргэлдээ засагдсан асруудад МҮХАҮТ-ын гишүүн үндэсний үйлдвэрлэгчид, спортын болон банк, санхүү, даатгалын үйлчилгээ үзүүлэгч ААН-ийн төлөөлөл оролцож спорт бизнесийн хамтын ажиллагаа, уялдаа холбоог хангах зорилгоор үйл ажиллагаагаа танилцуулж байна.
