МҮХАҮТ-ын Ерөнхийлөгч О.Амартүвшин “SamAuto” компанийн төлөөлийг хүлээн авч уулзлаа
МҮХАҮТ-ын Ерөнхийлөгч О.Амартүвшин Бүгд Найрамдах Узбекистан улсын “SamAuto” компанийн Бүгд Найрамдах Казахстан улс дахь Төлөөлөгч Бакиев Фахридин, тус компанийн Ази-Африкийн бүсийн Худалдааны хөгжил хариуцсан захирал Имуратов Жахангир нарыг хүлээн авч уулзлаа.
“SamAuto” компанийн төлөөллүүд өөрсдийн үйл ажиллагаа болон бүтээгдэхүүн үйлчилгээгээ танилцуулж, Монголын зах зээлд нэвтрэх хүсэл, сонирхолтой байгаагаа уулзалтын эхэнд уламжилж, хоёр орны худалдаа, эдийн засгийн хамтын ажиллагаанд МҮХАҮТ гүүр болж, дэмжлэг үзүүлэхийг хүссэн юм.
Бүгд Найрамдах Узбекистан улсын “SamAuto” нь автобус үйлдвэрлэлийн чиглэлээр үйл ажиллагаа явуулж ирсэн, олон жилийн туршлагатай компаниудын нэг юм. Тус компанийн үйлдвэрлэсэн автобус дотоодын нийтийн тээвэрт үйлчлэхээс гадна Бүгд Найрамдах Казахстан улсад туршилтаар ашиглагдаж эхэлсэн байна. “SamAuto” нь БНКазахстан улсад хамтарсан үйлдвэрээ байгуулсан бол Гүрж, Азербайжан улсад бүтээгдэхүүнээ танилцуулж, хамтын ажиллагааг эхлүүлжээ. Төв Азийн автобус үйлдвэрлэлийн зах зээлд “SamAuto” нь томоохон байр суурь эзэлдэг аж.
Улаанбаатар хотын нийтийн тээврийн шинэчлэлд оролцох, Монгол Улсад Төлөөлөгчийн газраа байгуулах, туршилтын тээврийг ойрын хугацаанд эхлүүлэх талаар төлөвлөж байгаагаа “SamAuto” компанийн Ази-Африкийн бүсийн Худалдааны хөгжил хариуцсан захирал Имуратов Жахангир онцлов.
МҮХАҮТ-ын Ерөнхийлөгч О.Амартүвшин Сайн чанарын автобусны зах зээлийн орон зай, хэрэгцээ манай улсад ихээхэн байгааг дурдаад “SamAuto” компанийн зүгээс өөрсдийн үйл ажиллагаагаа Монголд таниулахад идэвх, оролцоотой байх, нарийн судалгаа хийх, Хамтарсан үйлдвэр байгуулах талаар судалж үзэх нь бизнес, эдийн засгийн тууштай хамтын ажиллагаанд ихээхэн үр дүнтэй эхлэл гэв.