(+976) 7727-7070
info@mongolchamber.mn
08:30 - 17:30
Ажлын цаг

НҮБ-ын стратегийн бодлого боловсруулахад хамтран ажиллана

2020/02/12 0

МҮХАҮТ-ын Ерөнхийлөгч О.Амартүвшин Монгол Улс дахь НҮБ-ын Суурин зохицуулагч Тапан Мишра-тай хамтран ажиллах боломжийн талаар уулзаж санал солилцлоо.

Монгол Улс дахь НҮБ-ын Суурин зохицуулагч Тапан Мишра нь 2003 оноос хойш НҮБ-ын системд ажиллаж байгаа бөгөөд Монгол Улс дахь НҮБ-ын Суурин зохицуулагчаар 2019 оны 9 сараас томилогдон ажиллаж байна.

Тэрээр МҮХАҮТ-ын Ерөнхийлөгч О.Амартүвшин, Ерөнхий нарийн бичгийн дарга Б.Саруул нарыг хүлээн авч уулзаж, НҮБ-ын тогтвортой хөгжлийн зориултуудыг хэрэгжүүлэхэд хувийн хэвшлийн оролцоо чухал бөгөөд нийгэм, эдийн засгийн хөгжлийн таатай орчныг бүрдүүлэхэд судалгаан дээр үндэслэн бодлого боловсруулах, бодлогын нэгдмэл байдал, уялдаа холбоо чухал гэдгийг онцолж байлаа.

Энэ жил 2017-2021 оны НҮБ-ын Хөгжлийн хөтөлбөрийн хэрэгжилтийн байдалд үнэлгээ хийж ажиллана. Ирэх жил НҮБ байгуулагдсаны 75 жилийн ой тохиох бөгөөд ирэх 25 жилийн хөгжлийн төсөөлөл, хамтдаа урагшлах арга замууд, НҮБ-ын зүгээс улс орнуудыг хэрхэн дэмжих, хувийн хэвшлийн төлөөлөлтэй хэрхэн хамтарч ажиллах талаар нээлттэй санал, бодлоо хуваалцах уулзалтыг МҮХАҮТ болон 21 аймгийн салбар танхимуудаар дамжуулан зохион байгуулж, ирэх 5 жилийн стратеги төлөвлөгөө боловсруулахад хамтран ажиллахаар санал солилцлоо.