“Эдийн засгийн коридорт чөлөөт бүс холбогдох нь” сэдэвт хөрөнгө оруулагчдын форум МҮХАҮТ-д эхэллээ
Чөлөөт бүсийг хөгжүүлэхэд тулгамдаж буй асуудал, хүнд суртал, гаалийн татварын хөнгөлөлт болон Монгол Улсын эдийн засагт үзүүлэх нөлөөллийн талаар “Эдийн засгийн коридорт чөлөөт бүс холбогдох нь” сэдэвт хөрөнгө оруулагчдын форумын хэлэлцүүлгээр ярьж байна.
2020 оны 01 сарын 16 өдөр, 11 цаг 00 минут:
ЧӨЛӨӨТ БҮСИЙГ ХӨГЖЛИЙН ГАРЦ БОЛГОХ ЦАГ БОЛСОН
“Эдийн засгийн коридорт чөлөөт бүс холбогдох нь” сэдэвт хөрөнгө оруулагчдын форум үргэлжилж байна.
Тус форумын үеэр Монгол Улсын Шадар сайд Ө.Энхтүвшин “Дэлхийн аль ч улсад чөлөөт бүсэд шаардлагатай дэд бүтцийг төр бүрдүүлж, бизнес эрхлэгчид аж ахуйн нэгжүүд үйл ажиллагаагаа эрхэлж ашиг олох нь бизнесийн салбарын үүрэг байдаг. Монгол Улс чөлөөт бүсийг хөгжлийн гарц болгохын тулд бидэнд зоримог шийдвэр бодит хэрэгжилт хэрэгтэй” хэмээн онцоллоо.
2020 оны 01 сарын 16 өдөр, 09 цаг 56 минут: Форумыг нээж МҮХАҮТ-ын Ерөнхийлөгч О.Амартүвшин “Чөлөөт бүсийн асуудал 1995 оноос яригдаж эхэлсэн ч 25 жилийн хугацаанд хууль эрх зүйн орчин бүрдүүлэх, хөрөнгө оруулалт татах, бодлогын дэмжлэг үзүүлэх асуудлууд тодорхой биш, нэгдсэн бодлогогүй явж ирсэн. Монгол Улсын хувьд хөдөө аж ахуйн түүхий эдийг нэмүү өртөг шингээн боловсруулж экспортлох, аялал жуулчлал, эко бүтээгдэхүүний экспортыг нэмэгдүүлэх нь чухал бөгөөд үүний тулд чөлөөт бүс, хилийн боомтуудыг хөгжүүлэхэд тулгарч байгаа асуудлыг цогцоор нь шийдэх бодлого, бодитой алхам чухал юм” хэмээв.
Тус форумаар төрийн байгууллагын төлөөллүүд, чөлөөт бүсийн ажлын албаны удирдлага, чөлөөт бүсийн хөрөнгө оруулагчид бизнес эрхлэгчид асуудлуудыг тал талаас нь ярьж, боломжийг тодорхойлон шийдвэр түвшинд хүргэх зорилготой нээлттэй хэлэлцэж байна.